Брнабиќ: Ако биде принудена, Србија ќе ја избере ЕУ, не Русија

Доколку Србија биде принудена да избира помеѓу блиските врски со Русија и членството во Европската Унија, ќе се одлучи за ова второто, изјавила премиерката на Србија, Ана Брнабиќ, во интервју за американската новинска агенција „Блумберг“, пренесува српската државна телевизија РТС.

Брнабиќ во интевјуто рекла дека како премиерка ќе го продолжи патот кој го почна нејзиниот претходник, сега претседател на Србија, Александар Вучиќ, и ќе ја подготви земјата за членство во ЕУ до 2020 година, кога ѝ завршува мандатот.

„ЕУ е местото каде што одиме – тоа е јасно“, рекла Брнабиќ.

Таа изјавила дека Србија има емотивни врски со Русија поради традицијата, културата и верата, укажувајќи дека голем број граѓани во земјата во целост ја доживуваат Русија како „поголем брат и заштитник“.

Според српската премиерка, овие чувства не можат да се занемарат, „но стратешкиот пат на Србија е кон ЕУ“.

Во врска со Косово, Брнабиќ, како што навел „Блумберг“, изјавила дека постигнувањето напредок во нормализацијата на односите со Приштина сега зависи од тоа Приштина да одобри некој степен на автономија на Србите што живеат на северот на Косово, а дека на самиот крај ќе биде одлучено по прашањето за статусот.

„Без разлика на тоа дали сме во целост подготвени во 2020 година да се придружиме на ЕУ, тоа сепак повторно ќе зависи од ЕУ дали сака да прифати нови земји членки“, рекла Брнабиќ.

Таа додала дека никогаш немала причина да се сомнева дека ќе има полна поддршка од Вучиќ за тешките прашања, но и одврзани раце да работи што мисли дека е најдобро.

Прашана дали ќе може да донесува одлуки без негов надзор, Брнабиќ изјавила дека „би била изненадена кога не би можела“.