Странски и домашни компании заинтересирани да инвестираат во Македонија

Вицепремиерот за економски прашања денеска изјави дека има компании кои се заинтересирани да инвестираат во Македонија веднаш по објавувањето на владините мерки за индустриски раст и згомеување на конкурентноста на македонската економија.

Тој на прес-конференција во Владата на РМ информира дека во изминатите три месеци имал остварено средби со околу 250 странски и домашни компании.

– Многу странски компании сакаат да инвестираат во Македонија. Има најмалку 10 кои по објавувањето на мерките ќе инвестираат во Македонија. Мерките нема да бидат редуцирани за странските компании, туку ќе важат и за македонските компании. Мерките ќе важат за сите кои ќе дадат придонес за македонската економија, посочи вицепремиерот Анѓушев.

Тој ги негираше тврдењата пласирани во јавноста дека Владата ги брка странските инвеститори. – Ниту еден странски инвеститор нема да биде избркан и нема да биде неиспочитуван во целата суштина на договорите што ги имаат потпишано. Сите странски инвеститори и понатаму ќе бидат поддржани и Владата ќе биде нивни добар партнер, потенцира вицепремиерот Анѓушев.

Најави дека Владата наредните денови ќе излезе и со анализа колку средства се потрошени за поддршка на странските инвеститори.

Бројките во анализата ќе бидат во кумулативен износ бидејќи не сакаат да им наштетат на компаниите, кои, како што рече, се добредојдени.

– Бројките ќе бидат кумулативни. Не сакаме да имаме влијаение врз работењето на поединечни компании. Тие се сите добредојдени и понатаму ќе бидат поддржани. Она што нема да го кажеме, а со цел само да не им наштетиме на компаниите, е дека нема да објавиме поединечно компанија по компанија колку добиле, појасни Анѓушев.