Средба на Иванов и Мицкоски во Вилата Водно
Во 13 часот ќе се одржи средба помеѓу претседателот на ВМРО-ДПМНЕ, Христијан Мицкоски и шефот на државата, Ѓорге Иванов, дознава КУРИР.
Средбата доаѓа откако Мицкоски претходно на прес-конференција побара средба со претседателот на државата откако премиерот Зоран Заев вчера се согласи за промена на уставното име Република Македонија во Северна Република Македонија.
Мицкоски денеска повтори дека ВМРО-ДПМНЕ нема да поддржи промена на Уставот, а со цел промена на уставното име и ќе се спротивстави со сите демократски и правни средства против овој капитулантски договор.
Според него, работата во моментот е пресериозна и сите политички субјекти имаат обврска кон Република Македонија и граѓаните.
-Затоа побарав итна средба со претседателот на државата, Ѓорге Иванов кој предводи една од институциите која е дел од државноста и интегритетот на државата и каде што ќе разговарам за ова суштинско прашање. Воедно, ја користам оваа прилика да побарам и средба со премиерот Зоран Заев на кој очекувам да ми биде доставен пишаниот документ, односно, она за што се согласил со неговиот грчки колега, Алексис Ципрас, рече Мицкоски.
