Богата културна понуда за новогодишните и божиќните празнувања во Делчево

Во соработка со НУЦК „Никола Јонков Вапцаров“, општина Делчево подготвува богата музичка понуда за новогодишните и божиќните празници. Како што информира претседателот на комисијата за организирање културни манифестации, Даниела Такева, празничната музичка програма ќе започне утре со целовечерен концерт на староградска музика и серенади во интерпретација на Градскиот хор од Штип.

-Концертот на Градскиот хор во Штип ќе се одржи овој петок со почеток во 19:30 часот во киносалата во Делчево. Овој хор ќе настапи со обработка на познати староградските теми и серенади, но и еврегрини од познати странски групи од рангот на АББА, потоа оперскиот пејач Џузепе Верди и други музичари. Се надеваме дека нумерите од овие изведувачи спакувани во нови аранжмани, ќе придонесат за една убава вечер во Делчево. Во рамки на културната понуда го најавувам и концертот на 17 јануари во чии рамки ќе настапи гудачкиот квартет „Вива стрингс“ кои ќе одржат целовечерен концерт. Овој настан е замислен како релаксирачки и интересен спој на класични гудачки инструменти кои изведуваат обработки на популарни поп и рок нумери, од позантите АББА, Мајкл Џексон, Стинг, Ерик Клептон, Колдплеј и други, истакна Такева.

Од останатите културни збиднувања од општината го најавуваат годишниот концерт на НУЦК „Никола Јонков Вапцаров“ кој ќе се одржи на 26 декември. Исто така како што инфомрираше Такева, во изведба на децата од детската градинка „Весели цветови“ годинава во салата на деветолетката „Ванчо Прке“ ќе се одржи и завршната новогодишна приредба, додека општината организира настан и за љубителите на филмската уметност.

– На 27 и 28 декември премиерно во Делчево ќе биде прикажан култниот филм на режисерот Ѓорче Ставрески, „Исцелител“, кој воедно е и македонски национален кандидат за наградата Оскар на Американската филмска академија. Филмот се прикажува во соработка со НУЦК„Никола Јонков Вапцаров“ и Советот на млади од Делчево, дополни Такева.

Општината во соработка со бизнис-заедницата годинава обезбеди 1.000 новогодишни пакетчиња кои градоначалникот на Делчево, Горан Трајковски, ќе ги додели на дечињата од детската градинка, двете деветолетки од градот, како и на децата од Дневниот центар во Делчево. За време на новогодишната ноќ, градоначалникот Трајковски ќе ги посети дежурните екипи од ПС Делчево и Граничната полиција од РЦ „Исток“„Делчево“ и Итната медицинска помош.