Аукција на џиновски новогодишни честитки во кривопаланечкото основно училиште “Илинден”

На аукцијата што ќе се одржи во холот на основното општинско училиште „Илинден“ од Крива Паланка, денеска ќе бидат изложени над двесте оригинални изработки, и тоа џиновски новогодишни честитки, елки, украси и декорации, изработени од рециклиран материјал. -Новогодишните празници се големи празници, кога треба да имаме голема елка, голем настан и се разбира големи желби, а каде би ги напишале големите желби ако не во големи џиновски честитки. Така се роди идејата за овој настан во кој учествуваа учениците и вработените во соработка со родителите. Од рециклирани материјали изработени се дваесет џиновски честитки и околу 150 мали честитки што се изложени на штафелаи и штандови во училишниот хол, рече наставникот Добри Јовевски. Рециклираниот материјал, како што посочи тој, го обезбедиле од локални општествено-одговорни компании што ја поддржале оваа активност и за целиот процес соработувале со тимот што ги водел активностите во училиштето. -Добро е и полезно да организираме почесто активности од овој вид во училиштето, бидејќи кај учениците се развива духот за претприемништво и начинот на прибирање средства кои би ги намениле за различни активности во зависност од потребите и идеите на ученичката заедница во нашето училиште, посочи директорката Марица Николовска. За одбележување на Новогодишните празници во училишниот хол учениците и наставниците изработија голема новогодишна елка со околу 400 пластични шишиња. Шишињата ги донесоа сите ученици, подеднакво давајќи придонес за одбележување на празниците. Настанот е отворен за јавноста, а најавено е присуство и на голем број претставници од јавни институции и компании што ќе учествуваат на аукцијата за да купат џиновска честитка што ќе ги краси нивните деловни простории.