Градоначалникот Поцков прими штитеници од „Мајка Тереза“ од Гевгелија

Гевгелискиот градоначалник Сашо Поцков денеска ги прими штитениците од Центарот за деца со посебни потреби „Мајка Тереза“ од Гевгелија кои по повод Новата 2019 година му врачија пригодна честитка и подарок што самите го изработиле.

Поцков им се заблагодари на дечињата за честитката и подарокот и им вети дека во текот на наредната недела, во пресрет на новогодишните и божикните празници, ќе го посети Центарот и ќе им додели новогодишни подароци.

Центарот „Мајка Тереза“ од Гевгелија, кој секојдневно го посетуваат 40 деца со посебни потреби, е единствен од ваков вид во Македонија. За штитениците се грижат 13 ангажирани лица меѓу кои дефектолог, логопед, физиотерапевт, психолог, педагог, социјален работник и воспитувачи.

Тие секојдневно одржуваат часови со децата поделени во четири програми, со цел на лицата со посебни потреби да им се обезбеди вистинска инклузија во општеството.