Во Охрид викендов се одржува Годишната манифестација на Македонската алпинистичка федерација

Со презентации на дел од активностите реализирани оваа година, синоќа во Охрид се одржа свечениот дел од Годишната манифестација на Македонската алпинистичка федерација.

Притоа беа презентирани меѓународните акции реализирани на Алпите и тоа во Словенија, Франција и Италија, акцијата на Пакленица во Хрватска, како и дел од активностите на локалниот Алпинистички клуб „Патагонија“ од Охрид, конкретно реновирањето на планинската куќа „Галичица“ и учеството во реализацијата на проектот за развој на Планинска спасителна служба во Охридскот регион.

На свеченоста беа доделени признанијата „Јован Ангелов – Циго“ на најуспешните алпинисти – членови на Македонската аплинистичка федерација. Алпинистичкиот клуб „Матка“ од Скопје беше прогласен за најуспешен алпинистички клуб, Зоран Мајсторски за најуспешен алпинист, Надир Мурсели и Зоран Мајсторски добија признанија за најуспешна алпинистичка наврска, а додека Тадеј Циривири, Матеј Мајсторски и Стефан Ристов се прогласени за најуспешни млади алпинисти.

-Алпинистичкиот клуб „Матка“ од Скопје веќе подолго време работи на зголемување на алпинистичката активност и втемелување на вистинските алпинистички вредности. Тоа го реализира преку успешни активности на клупско ниво во домашните локалитети и локалитетите во странство. Голема гордост на клубот претставува и обемното членство што постојано расте, се развива и созрева следејќи ги примерите на постарите алпинисти, изјави претседателот на АК „Матка“, Илија Циривири.

Алпинистичкиот викенд во Охрид предвидува и неколку активности на терен со предвидени искачувања на кулоарите на Галичица.