Работен состанок на министерката Апостолска со градоначалникот на општина Крушево

Министерката без ресор задолжена за странски инвестиции, Зорица Апостолска денес имаше работен состанок со градоначалникот на општина Крушево, Томе Христоски.

Инфраструктурните и економските развојни планови на општина Крушево и можностите кои со нив се отвораат за привлекување на нови странски инвеститори, биле темите на разговор на средбата.

Апостолска, како што соопштија од нејзиниот кабинет, истакнала дека намерата на Владата е економскиот раст и развој на земјава да го постави на здрави темели преку успешни интеракции на домашни и странски компании, притоа поддржувајќи го домашното стопанство во зајакнувањето на неговите технолошки капацитети и организациони способности, а кои би соодветствувале на потребите и барањата на технолошки напредни странски компании.

Од страна на градоначалникот Христоски биле претставени потенцијални локации за реализација на нови гринфилд и браунфилд странски инвестиции во општината, при што нагласил дека индустриската зона е финализирана и инфраструктурно оспособена за реализација на конкретни инвестициски проекти.