Малиот групен дом во Штип подготвен да прими четири дечиња без родители

Малиот групен дом во Штип ќе се отвори на почетокот на наредната година. Во него ќе бидат сместени четири дечиња, кои сега се згрижени во Домот без родители „11 Октомври“ – Скопје. Директорот на Центарот за социјални работи -Штип Станко Димитров вели дека капацитетот е за седум деца, но на почетокот ќе стартуваат со грижа на четири дечиња.

-Малиот групен дом е опремен, сите работи се во завршна фаза, опремата е монтирана. Персоналот е примен, обврска на Центарот за социјални работи – Штип е да учествува со тројца стручни работници и тоа педагог, психолог и социјален работник. Тоа се нови вработувања, кои се извршени од 25 декември и ќе имаме двајца негователи од локалната самоуправа. Тоа е договорна обврска, вели Димитров.

МИА кога го посети Малиот групен дом беше затворен, бидејќи како што вели Димитров забележува вработените мора да поминат и низа на обуки и да се запознае со дечињата кои ќе бидат згрижени во него, а се на возраст од осум до 12 години.

Малиот групен дом се наоѓа во штипската населба „Пребег“, каде што на долниот кат е Центарот за аутизам, додека на горниот кат е домот, во кој ќе се згрижат децата без родители и родителска грижа. Проектот се реализира во соработка со општината, Министерството за труд и социјална политика и Центарот за социјални работи-Штип.