Саудиска Арабија може да го замени Бразил во календарот за 2021 година

Трка на улиците на Џеда во Саудиска Арабија може да биде вклучена во календарот на Формула 1 за 2021 година, според различни извори.

Трката во градот со 3,5 милиони жители ќе се одржи на крајот на сезоната, а ќе се групира со Гранд При на Абу Даби, што е последната трка годинава. Така, третата трка на Арапскиот полуостров ќе ја замени Големата награда на Бразил, чиј договор на домаќинот истекува на крајот на 2020 година, а организаторот на трката се чини дека е во невозможна битка за нејзино обновување. Причината за ова е клаузулата според која промоторот на натпреварувањето во Сао Паоло не плаќа надоместок за организацијата во последните три години, а тоа го вклучил во договорот Берни Еклстоун, кој не го води спортот од 2017 година.

Од друга страна, на почетокот на оваа година, сопствениците на Формула 1 – Либерти Медија – потпишаа спонзорски договор со саудиската нафтена компанија „Арамко“, која во моментов е спонзор што дава најмногу пари и рекламирање. Како дел од зделката, Арамко е исто така главен спонзор на три трки оваа година, а на останатите стартови, повеќето билборди околу патеката се во боите на Арамко.

Додавањето на ГП на Саудиска Арабија во календарот на Формула 1 нема да биде изненадување, бидејќи земјата започна активно да се појавува на мапата на мото спортот во последните неколку години. Домаќин е на рунди во Формула Е од 2018 година, а оттогаш на нејзината територија се одржува легендарното рели Дакар.

Освен престижните натпреварувања од светот на моторните спортови, во 2019 и 2020 година, Џеда беше домаќин на последните натпревари за Суперкуповите на Италија и Шпанија.