Објавен книжевниот преглед „Нова европска драма“
Издавачката куќа „Феникс“ го објави книжевниот преглед „Нова европска драма“. Во изборот што го направи проф. д-р Христо Петрески се објавени следните автори и драмски текстови: „Оркестар Титаник“ од Христо Бојчев (Бугарија), „Бајка за витезот без коњ“ од Марта Гушњовска (Полска), „Херакле, лудило“ од Криштоф Довјак (Словенија), „Кирил и Методиј, who are you?!“ од Јордан Плевнеш (Северна Македонија) и „А во ноќите лежиме немо“ од Томас Фрајер (Германија).
Во предговорот на книгата со наслов „Нови драмски бродови во немирни и брзи води“, составувачот Петрески, меѓу другото, истакнува дека во новата европска драма приказната е едноставна, ликовите се од сегашноста и секојдневието, монолозите и дијалозите се автентични, изненадувачки чисти, директни, природни и неизвештачени.
-Крајот на драмите најчесто е отворен, како оттргнат дел од животот – парче со срце и душа. Станува збор за уметнички стилови и правци, кои светот го набљудуваат и прикажуваат како нешто нормално и вообичаено. Сцените се кратки и ударни, нарацијата е сведена на минимум, а репликите се преземени од реалниот свет и живот. Настаните се редат според принципите на филмската монтажа – брзо, молневито и динамично. Драмите, па и светот, одеднаш и драматично како да стануваат превртено и искривено, а сепак толку многу директно, реално и метафизичко огледало, пишува Петрески.
Според него, структурата на текстовите е значително изменета и поразлична во однос на традиционалното и веќе виденото, регистрираното и доживеаното, со нагласено инсистирање на формалните и техничките решенија, наспроти содржинските и суштинските концепти и аспекти.
Издавачката куќа „Феникс“ претходно ја објави и книгата „Нова европска проза“, а следуваат изборите „Нова европска поезија“ и „Нов европски есеј“, како дел од едицијата „Европски книжевни видици“ на проектот „Прозорец кон Европа“. Книгата е објавена со материјална поддршка од Делегацијата на Европската Унија во Скопје.
