Прв настап на младите музичари од Крива Паланка во Европската куќа

Со настапот на учениците од музичката паралелка на основното општинско училиште „Јоаким Крчовски” од Крива Паланка во Европската куќа во градот, реализирана е првата официјална соработка помеѓу училиштето и ЕУ инфо центарот во Крива Паланка.

Младите музичари под менторство на професорката Лариса Жулина-Митовски прв пат настапија во Europe House-Крива Паланка, што беше воедно и прв настап во живо од почетокот на Ковид-19 пандемијата.

– Учениците се претставија со инструментални музички композиции од реномирани европски композитори, како дел од одбележувањето на 9. Мај – Денот на Европа, Денот на победата над фашизмот и Денот на мајките. Задоволна сум од успешниот настап на моите вредни ученици, како и од, за прв пат остварената соработка со Европската куќа во градот. Навистина е задоволство што за прв пат остваривме соработка со Europe House-Крива Паланка, амбиентот беше прекрасен, а посебно радува фактот што по подолго време имавме настап со физичко присуство што е одлично искуство за учениците во услови на он-лајн настава. Моите ученици се многу среќни што настапија во живо, а нивните родители се гордеат бидејќи одлично се претставија пред професионалните камери, изјави професорката Лариса Жулина-Митовски.

Дел од учениците од музичката паралелка вчера учествуваа на вториот Меѓународен фестивал за млади талентирани музичари „Сергеј Михајлов 2021″ во Штип.

-Фестивалот е со натпреварувачки карактер, организатор е ДМУЦ ,,Сергеј Михајлов“, со поддршка на Министерство за култура. Фестивалот беше реализиран со физичко присуство на повеќе локации во градот, а истовремено беа вклучени и он-лајн натпреварувачи. Натпреварувањето беше организирано согласно сите протоколи за заштита од пандемијата, а учесниците ги оценуваа реномирани професори. И покрај големата конкуренција од талентирани музичари, ученикот Михаил Митовски освои прва награда, додека Теодор Смиљков трета награда, на што им честитам и особено се гордеам, додаде Жулина-Митовски.ид/