Се докомплетира водоводот во виничкото село Блатец

Во виничкото село Блатец почнаа градежните работи за докомплетирање на главниот цевковод, со што ќе се обезбеди приклучување на сите домаќинства на јавната водоводна мрежа.

Инвестицијата е во вредност од над 1,5 милион денари, што Општина Виница ги обезбеди како поддршка од Бирото за регионален развој на Министерството за локална самоуправа.

-Цевководот е со должина од над 830 метри, при што ќе се користат полиетиленски цевки со пречник од 60 до 160 милиметри, во зависност од потребата. Дополнително, ќе се изградат неопходните шахти и ќе се постави придружна опрема за нормално функционирање на системот за водоснабдување. Со неговото комплетирање ќе се овозможи проширување на секундарната мрежа, односно и домаќинствата кои досега немаа можност да се приклучат, во иднина да добиваат вода за пиење од јавниот водовод, истакна градоначалникот на Виница, Ивица Димитров.

Изведувач на градежните работи е компанијата „Коп инженеринг“ од Скопје која има обврска поставувањето на цевководот да го заврши во рок од четири месеци.