Излезе од печат монографијата „Сто години струмичка ликовна уметност“

Здружението за култура „Транзен“ ја издаде монографија насловена како „Сто години струмичка ликовна уметност“ по повод претстојното отворање на новата Градска галерија во Струмица, кога и ќе случи промоцијата со изложба од делата на авторите застапени во неа.

– Се работи за истражување кое опфаќа период од 1921 до 2021 година, време во кое се одвива континуиран ликовен живот во Струмица и Струмичко. Во монографијата се застапени 150 репродукции во боја, текстови од историчари на уметноста, рецензии од каталози, сведоштва од архивите на уметниците и автобиографски записи. Уредник е ликовниот уметник Никола Пијанманов, велат од „Транзен“.

Хронолошко-критичкиот осврт во монографијата е на историчарот на уметноста Марјан Минов.

-Големи беа предизвикот и честа да се работи на ваков научен труд, затоа што струмичката ликовна уметност има свои длабоки корени и традиција, но и артистички квалитет, кој на моменти го надминува локалното ниво. Ваквиот монографски труд, со кој се реафирмираат струмичките ликовни уметници и нивните дела ќе им остави цврст фундамент за истражување на наредните генерации историчари на уметност, рече Минов.

Монографијата е издадена во соработка со Општина Струмица, а е финансирана од „Цивика Мобилитас“ и манифестацијата „Струмица град на култура 2021 година“.