Костов нов тренер на прволигашот Тиквеш

Стратегот Влатко Костов е назначен за нов тренер на повратникот во Првата македонска фудбалска лига (ПМФЛ) Тиквеш и своето деби на клупата на кавадаречкиот тим ќе го има идната недела на првенствениот натпревар на домашен терен против Македонија ЃП.

– Му посакуваме топло добредојде на Костов во Кавадарци и многу радосни моменти и успех во неговиот нов дом, соопшти Тиквеш, кој по шест одиграни кола во ПМФЛ сè уште ја чека првата победа и со два бода е на претпоследното место на табелата.

Тиквеш во петокот спогодбено ја прекина соработката со тренерот Пане Блажевски, под чие водство клубот од Кавадарци по пауза од 17 години се врати во ПМФЛ.