Деветтата награда „Вацлав Хавел“ за човекови права, која наградува исклучителни акции на граѓанското општество во корист на човековите права, ја доби белоруската активистка и лидер на опозицијата Марија Калешникава, јави дописникот на МИА од Стразбур.

Наградата, во износ од 60.000 евра, беше доделена на специјална церемонија организирана на отворањето на есенската пленарна сесија на Парламентарното собрание на Советот на Европа (ПССЕ), во Стразбур.

Марија Калешникава е една од лидерите на опозицијата во Белорусија и член на Советот за координација. Таа беше шеф на изборниот штаб на поранешниот претседателски кандидат Виктар Бабарика и е еден од трите женски симболи на белоруската опозиција и борбата на нејзиниот народ за граѓански и политички слободи и права.

Таа беше киднапирана во Минск во септември 2020 година и се најде на насловните страници кога го искина пасошот на границата за да спречи нејзино насилно враќање и прогонство од Белорусија. Потоа била приведена, а во септември 2021 година, била осудена на 11 години затвор за нејзината политичка активност.

Прифаќајќи ја наградата во нејзино име, сестрата на Марија, Татсијана Хомич, му се заблагодари на ПССЕ и рече дека нејзината сестра сака да ја посвети својата победа на сите оние во Белорусија кои се бореа за своите права.

-Оваа награда е знак на солидарност на целиот демократски свет со народот на Белорусија. Исто така, за нас Белорусите е знак дека меѓународната заедница не поддржува и дека сме на вистинскиот пат “.

При предавањето на наградата, претседателот на ПССЕ, Рик Даемс, рече: „Во спротивставувањето на режимот кој се одлучи за сила и бруталност наспроти мирни и легитимни протести, г -ѓа Калешникава покажа дека е подготвена да ја ризикува сопствената безбедност за кауза поголема од самата себе – таа покажа вистинска храброст “.

-Навистина, храбар е зборот што мислам дека најдобро ги опишува тројцата кандидати во потесниот круг. Како и г -дин Хавел, сите покажаа подготвеност да ја жртвуваат сопствената безбедност, сопствената благосостојба и, на крајот, својата слобода, за поголема кауза – заштита на човековите права заради сето тоа. Можеби тоа е цената, но цената е висока “, додаде тој.

Другите двајца номинирани кандидати за потесен избор беа „Репортери без граници“, водечка меѓународна невладина организација која ја брани слободата на медиумите и бурундискиот бранител за човекови права, Гермен Рукуки, кои добија дипломи. Репортери без граници беше претставен од нејзиниот директор, Кристоф Делоар. Од безбедносни причини, Рукуки не можеше лично да биде присутен во Стразбур, но го претставуваше неговата сестра Сколастика Рукуки, која ја доби дипломата во негово име.

Наградата „Вацлав Хавел“ за човекови права се доделува секоја година од ПССЕ, во партнерство со библиотеката „Вацлав Хавел“ и Фондацијата „Повелба 77“, „за наградување на исклучителни дејствија на граѓанското општество во одбраната на човековите права во Европа и надвор од континентот“. Се состои од сума од 60.000 евра, пехар и диплома.

Од своето основање, наградата е доделена на Луџаин Алхатлул, саудиска активистка за права на жените (2020), заедно со Илхам Тохти и Младинската иницијатива за човекови права (2019), Ојуб Титиев (2018), Мурат Арслан (2017), Надија Мурад (2016), Људмила Алексеева (2015), Анар Мамедли (2014) и Алеш Бијалитски (2013).



Автор: Администратор
Објавено на: 27/09/2021 16:24