Црногорецот Добрковиќ нов ракометар на Вардар 1961

Црногорскиот кадетски репрезентативец Андреј Добрковиќ (18) е нов член на Вардар 1961, соопшти попладнево македонскиот ракометен првак.

Добрковиќ, кој игра на позиција на среден бек, потпиша двегодишен договор, а во составот на Вардар доаѓа од тимот на словенечки Целје.

Новото засилување на Вардар во моментов се подготвува со репрезентацијата на Црна Гора за настап на кадетското ЕП што од 4 до 14 август ќе се одржи во Подгорица. Потоа ќе му се приклучи на Вардар на подготовките за новата сезона.

Добрковиќ е познато презиме што се поврзува за Вардар, бидејќи неговиот татко Марко Добрковиќ настапуваше една сезона во актуелниот македонски шампион во сезоната 2005/2006.