Дебитантот Халанд урива рекорди во Премиер лигата

Норвешкиот голгетер во редовите на Манчестер сити, Ерлинг Халанд, постави нов рекорд во својата дебитантска сезона во Премиер лигата, откако го постигна третиот хет-трик за што му беа потребни само осум натпревари, пренесуваат денеска британските медиуми.

Манчестер сити вчера во градското дерби го совлада Манчестер јунајтед со 6-3 во натпревар од 9. коло во Премиер лигата. Халанд постигна три голови, а учествуваше во акциите кои претходеа на пет од шесте погодоци на својот тим.

На Халанд ова му беше трет хет-трик сезонава, откако претходно постигна по три голови на дуелите против Кристал Палас и Нотингем Форест.

Досегашниот рекордер беше поранешниот англиски репрезентативец Мајкл Овен кому за првите три хет – трика му беа потребни дури 48 натпревари.