Роналдо: Саудиското првенство е поквалитетно од француското

Португалскиот фудбалер Кристијано Роналдо оцени дека саудиското првенство, во кое настапува во редовите на Ал Наср, е подобро и поквалитетно од француската лига.

„Да бидам искрен, мислам дека саудиското првенство не е полошо од француското првенство. Мислам дека е поконкурентно. Можат да зборуваат што сакаат, тоа е мое мислење, а тука играм една година и знам што зборувам“, рече Роналдо на свеченото доделување на годишните награди во Дубаи.

Саудиска Арабија изминатите години вложува многу пари за агнажирање квалитетни фудбалери, пред сè од европските лиги.

„Мислам дека сега сме подобри од француското првенство и продолжуваме да напредуваме“, изјави Роналдо, кој на свеченоста во Дубаи доби три награди – за најдобар фудбалер на Блискиот исток, наградата „Марадона“ за најдобар голгетер во 2023 година и наградата од навивачите за омилен играч.