Над 180.000 банкноти од 500 евра се повлечени од оптек во Косово

Централната банка на Косово (ЦБК) објави дека бројката на банкноти од 500 евра што граѓаните ги депонирале во деловните банки, а потоа и во ЦБК, како пари повлечени од оптек, надминала 180.500 парчиња, достигнувајќи вредност од преку 90 милиони и 250 илјади евра, јави дописникот на МИА од Приштина.

Ова, како што соопшти ЦБК, е еден од директните ефекти на Правилникот за готовинско работење од неговото донесување, „придонесувајќи за постигнување на целта за финансиски систем со интегритет и помагајќи ја националната стратегија против информалноста и сродните појави“.

Правилникот за готовинско работење, меѓу другото, ги обврзува сите банкарски и небанкарски финансиски институции да прекинат со рециркулација на банкнотата од 500 евра кај нивните клиенти.