Перез останува уште две години во Ред Бул
Вториот возач на Ред Бул во Формула 1, Серхио Перез ќе остане уште две сезони во тимот. Ова денеска официјално го соопштија светските шампиони во Формула 1.
Чеко и Макс Верстапен така ќе бидат тимски колеги 6 последователни сезони, а актуелниот договор на Мексиканецот истекуваше на крајот од сезоната 2024 година.
Триесет и четири-годишниот Перез силно ја започна годината со три втори места во првите четири старта, што дефинитивно му помогна да го задржи своето место. Во последните стартови, пак, формата на Перез повторно падна, бидејќи во Монако излета во првиот дел од квалификациите, а неколку секунди по стартот се судри со Кевин Магнусен и предизвика спектакуларен крах.
-Среќен сум што останувам и ќе го продолжиме нашето патување заедно за да можам да придонесам во развојот на историјата на тимот уште две години. Да се биде дел од овој тим е огромен предизвик, но ми се допаѓа, изјави Перез.
Оваа одлука на Ред Бул му ја затвора вратата на Карлос Саинц, бидејќи уште пред неколку недели се слушаше дека Шпанецот всушност нема шанси да се пресели во Милтон Кинс. На тој начин, Карлос ќе мора да оди во Заубер/Ауди или Вилијамс и Алпин ако сака да остане во Формула 1 следната година.
