Украинските разузнавачки служби беа вмешани во смртоносниот терористички напад на концертната сала „Крокус Сити“ во Москва во март, изјави денеска директорот на руската Федерална служба за безбедност (ФСБ), Александар Бортников.

-Украинските и западните разузнавачки служби го прошируваат кругот на можни сторители, регрутирани за извршување злосторства од висок профил во Русија, рече Бортников за време на виртуелниот состанок на Националниот антитерористички комитет (НАК), пренесоа руските медиуми.

Тој додаде дека „Киев и неговите странски поддржувачи, исто така, им помагаат на меѓународните терористички организации кои ги обучуваат и опремуваат овие луѓе“.

-Главните цели на украинското западно разузнавање се помладите луѓе и работниците мигранти, рече тој.

Во нападот на „Крокус Сити Хол“ на 22 март загинаа 145 лица, а повеќе од 550 беа повредени. Четворица вооружени напаѓачи упаднаа во зградата пред рок концерт, отворајќи оган врз толпата пред да ја запалат.

Осомничените сторители, сите државјани на Таџикистан, биле приведени веднаш по нападот додека се обидувале да побегнат со автомобил кон украинската граница. Оттогаш, речиси десетина нивни соучесници се уапсени.

Одговорноста за нападот ја презеде терористичката Исламска држава. Сепак, Москва сугерираше дека Киев ја користи исламистичката група како свој „застапник“. Украина негираше каква било вмешаност, додека Западот инсистираше на тоа дека сите докази укажуваат на ИСИС како единствен виновник.



Автор: Администратор
Објавено на: 11/06/2024 15:00