Инзаги: Милан играше подобро од Интер, ние не бевме комплетни

Тренерот на Интер, Симоне Инзаги ги наведе причините за поразот на неговиот тим во градското дерби со Милан.

Интер синоќа како домаќин загуби од Милан со 1:2 во натпреварот од 5.коло од италијанското фудбалско првенство.

- Милан, секако, е добар тим. Тие одиграа подобро од нас и заслужија да победат. На работите им пристапивме на погрешен начин, не бевме комплетен тим - тоа ретко се случува. Ниту едно полувреме не го започнавме со ставот што треба да го имаме и се обидов да направам некои промени, но тоа не помогна, изјави Инзаги за „Football Italia“.

Тренерот додаде дека играчите донеле лоши одлуки на овој натпревар, и кога имаа посед, и без топка.

- Требаше да направиме повеќе и јас како тренер преземам одговорност, додаде тој.

Интер со осум бода се наоѓа на 6.место, Милан е 7-ми исто така со осум освоени бода.

Во следното коло од Серија А, избраниците на Инзаги ќе играат против Удинезе на 28 септември.