На протестот на опозицијата во Тирана без говори но тензично со фрлање молотови коктели кон владата и други институции

Националниот протест што вечерва се одржува во Тирана, во организација на опозициските демократи, под мотото "Марширање кон Тирана - или сега или никогаш" главно минува во марширање, без обраќања, но не и без тензични моменти.

Учесниците во протестот кога стигнаа пред владата почнаа да фрлаат кон објектот со тврди предмети и молотови коктели од кое се запали дрво. Имаше и судир меѓу нив и полицијата, поради што мораше да интервенира и единицата за брзо распоредување "Шќипоња", по што ситуацијата се смири.

Протестот го предводеа генералниот секретар на партијата Фљамур Нока, координаторот на пратеничката група Газменд Барди и пратеници а им се придружи и лидерот на Партијата на слободата и поранешен претседател на земјата Илир Мета.

Од пред владата минаа пред зградата на Парламентот, зградата на општина Тирана, покрај Врховниот суд па се до седиштето на Социјалистичката партија.

Токму тука беше најтензично, дојде до судир со полицијата при обид да влезат, беа одбиени по што почнаа да фрлаат пиротехнички средства и молотови коктели, изби пожар, што го зафати и големиот билборд со ликот на Еди Рама, интервенираше противпожарна единица а полицијата толпата ја разби со солзавец.

За безбедноста се ангажирани најмалку 1500 полициски службеници од неколку сектори, а на готовност беше и специјалната единица "Ренеа". Владата, парламентот, општина Тирана, МВР, други институции и седиштето на владејачката Социјалистичка партија беа под силно полициско обезбедување.

Освен што носеа транспаренти, учесниците на протестот извикуваа "Рама оди си", "техничка влада, техничка влада" "Сали Бериша".

Попатно тие запалија и автобуска постројка а создадоа и хаос во сообраќајот, не дозволувајќи да се движат возилата.

Во изјава за медиумите Мета рече дека целта на вечерашниот протест е "уривање на режимот на нарко-државата и враќање на правдата".

- Луѓето се повеќе од револтирани и нивната реакција е јасна и ќе продолжи и понатаму се до постигнување на целта, рече Мета.

Со вечерашниот протест опозицијата го означи почетокот на граѓанската непослушност.

Лидерот на демократите Сали Бериша, кој е во домашен притвор, преку социјалните мрежи, пред протестот, уште еднаш повика на масовност.

- Денеска е историски ден за сите. Денеска почнува нашето патување до победа. Сите заедно против нарко-владата, порача Бериша.

Протестот кој требаше да почне во 18 часот почна со задоцнување од половина час, а од пред 20 часот се одвива мирно само со марширање низ градот и извикување "Рама оди си"

Според организаторот на "протестот имало над 120 илјади народ од сите делови на земјата".