Пјастри сака да вози на Ле Ман

Лидерот во Формула 1, Оскар Пјастри, изјави дека би сакал да учествува во Светското првенство во издржливост (ВЕЦ) и конкретно во трката 24 часа Ле Ман, но само по завршувањето на неговата кариера во Формула 1.

Последниот активен возач на Формула 1 што стартуваше на патеката „Сарт“ беше двократниот светски шампион Фернандо Алонсо во 2018 година. Три години претходно, Нико Хулкенберг го стори истото, двајцата победија на Ле Ман. За Алонсо, ова беше првиот од двата последователни триумфи што ги забележа со Тојота, кога ја освои и титулата во ВЕЦ во сезоната 2018-19.

Сепак, Пјастри рече дека нема да биде фер и кон Формула 1 и кон ВЕЦ ако не се фокусира целосно на едно од двете првенства. Неговата изјава доаѓа неколку недели откако Мекларен објави дека ќе влезе во водечката класа „хиперкар“ на ВЕЦ во 2027 година.

-Некогаш, но нема да биде наскоро. Во моментов сум доста среќен во Формула 1. Не мислам дека би било фер кон двете првенства ако се обидете да ги комбинирате. Можеби тоа не би било толку штетно за вашето учество во Формула 1, но кога влоговите се високи, како што е сега, работите се менуваат. Поединечно, нема да му го посветите на Ле Ман вниманието што го заслужува. Не мислам дека е трка во која некој би сакал да учествува без соодветна подготовка. Затоа ќе почекам додека не завршам со Формула 1, а потоа ќе го замолам Зак Браун да ми даде шанса, рече Пјастри