Новоизбраниот претседател на Мексико Мануел Лопез Обрадор не побара полициско обезбедување и на средбата со досегашниот претседател Енрике Пена Нието замина во обичен автомобил, со спуштени прозорци, опкружен само од сниматели кои го следеа на мотоцикли.
Доскорешниот премиер на Малезија Наџиб Разак, кој беше обвинет за корупција набргу по изборот на Махатир Мохамед за премиер, се изјасни за невин на вчерашното судско рочиште.
Антивладини демонстранти утрово повторно се собраа пред зградата на полскиот Врховен суд во Варшава, за да изразат поддршка за владеењето на правото и за претседателката на Судот Малгожата Герсдорф.
Еквадорските власти издадоа налог за апсење на поранешниот претседател Рафаел Кореа, кој живее во Белгија, поради организиран обид за киднапирање на политички противник во 2012 година.
Германската канцеларка Ангела Меркел предупреди дека иднината на Европската унија зависи од тоа дали таа ќе успее да најде одговори на мигрантското прашање.
Францускиот претседател Емануел Макрон се сретна со колегата од Нигерија Мухамед Бухари, да договорат заеднички активности против исламистичките групи во Западна Африка.
Ирските власти забранија наводнување тревници и градини во областа на Даблин поради необичната суша во земјата, која е позната по зеленилото.
Во интервју за германски „Билд“, унгарскиот премиер Виктор Орбан изјави дека е подготвен за разговори со Германија по прашањето на мигрантите, доколку Германија претходно постигне договор за ова прашање со Австрија.
Џејн Хол Лут од Обединети нации ќе ги повика сите страни вклучени во напорите за обединување на етнички поделената држава Кипар, со цел да утврди дали се остварени услови за продолжување на мировните преговори, најави заменик портпаролот на ОН, Фархан Хак.
Портпаролот на Белата куќа, Хоган Гидли изјави дека претседателот Доналд Трамп на Самитот на НАТО ќе им каже на земји членки дека САД не можат да бидат „касичка прасичка“.
