Над 20.000 обиди за шверц на мигранти

Припадниците на Армијата на Република Македонија (АРМ) од составот на баталјонот на Воена полиција (ВП) во раните утрински часови во близина на браната „Паљурци“ на правецот кон Богданци во пограничното подрачје на територијата на Република Македонија спречија обид за шверцување емигранти во моторни возила кои биле управувани од македонски државјани.

АРМ соопшти дека во акцијата е спречено нелегално минување на 11 странски државјани од кои шест се деца.

Во согласност со надлежностите, возилата со возачите и нелегалните минувачи се обезбедени и предадени на надлежните органи од МВР на натамошна постапка.

Мерките кои АРМ ги спроведува согласно доделените задачи од одлуката на претседателот на Република Македонија и врховен командант на Вооружените сили, во поддршка на МВР и граничната полиција, низ зајакнато и непрекинато обезбедување на јужната и северната граница даваат позитивен ефект и соодветен придонес во зачувувањето на безбедноста на граѓаните на нашата држава.

АРМ е подготвена да одговори на секаков облик на безбедносно нарушување на територијалниот интегритет и суверенитет на Република Македонија, вклучувајќи ги обидите за насилно влегување на територијата на нашата држава, што е присутно од почетокот на мигрантската криза, се наведува во соопштението од АРМ.