ВМРО-ДПМНЕ: СДСМ нема намера да работи во корист на граѓаните

ВМРО-ДПМНЕ во денешното соопштение обвинува дека СДСМ нема намера да работи во корист на граѓаните на Република Македонија.

Со неприфаќањето на ниту еден предложен амандман од страна на ВМРО-ДПМНЕ во ребалансот на буџетот, посочуваат од таа партија, на сите им стана јасно дека СДСМ сака само да истера теснопартиски интереси на грбот на граѓаните.

– СДС не ја разбира суштината на демократијата. Пратениците на СДС ги одбија сите закони предложени од ВМРО-ДПМНЕ кои беа предложени за ребаланс за буџетот. СДС работи само за свој интерес и само во своја корист. Нив не ги интересираат проблемите на над 450.000 граѓани кои својот глас го дадоа за ВМРО-ДПМНЕ, истакнуваат од ВМРО-ДПМНЕ.

Според ВМРО-ДПМНЕ, СДС се однесува како Македонија да е нивна приватна фирма и сите пари од ребалансот на буџетот ги скрои по нивна желба, а не за потребите на граѓаните на Република Македонија.

– Додека СДС беа во опозиција на сите страни се жалеше дека нема демократија и ветуваа транспарентно и одговорно работење. Со одбивањето на сите амандмани се покажа дека тоа им беше само предизборна лажна реторика а кога дојдоа на власт веднаш го покажаа нивното вистинско лице, додаваат од ВМРО-ДПМНЕ и го повикуваат СДСМ да ги земе предвид барањата на граѓаните за решавање на нивните проблеми.