Груевски: Пред нас е нова борба за современа, просперитетна и економски напредна Македонија

Почитувани граѓани на Република Македонија,

Дозволете ми од мое лично име и од името на ВМРО-ДПМНE да ви го честитам државниот празник 2-ри Август- Илинден, денот кој е белег на македонската борба за државност, слобода и непокорот на нашиот народ.

Денес Македонија ја слави и ја чествува борбата за слобoда и независност, која за првпат организирано се манифестираше на Илинден 1903 година во Крушево, кога со избувнувањето на Илинденското востание, ние Македонците и сите граѓани од сите заедници докажавме дека сме слободољубив народ, жеден за правда, еднаквост и просперитет, и тоа се и мотивите и постулатите кои го предизвикаа и врз кои се реализираше вториот Илинден 1944 година кога во манастирот Св. Прохор Пчински нашите предци со сопствени сили, жртви и залагања ја создадоа долго очекуваната и со борба исткаена сопствена модерна македонска држава.

Македонија низ историјата опстојала поради својата цврста желба за слобода и независност, еднаквост помеѓу народите и почит кон ближниот. Ние секогаш сме го почитувале другиот, но никогаш не сме дозволиле некој да го негира и оневозможува нашето постоење, и токму тие карактеристики не однесоа и на страната на победничката антифашистичка коалиција во Втората светска војна.

Драги сограѓани,

Пред нас е нова борба, борба за современа, просперитетна и економски напредна Македонија, рамо до рамо со останатите европски држави. Ако борбата на нашите предци беше создавање на независна македонска држава, нашата борба е истата да ја зачуваме и да и го трасираме патот кон економски напредок и просперитет, кон НАТО и ЕУ, каде природно припаѓаме.

Тоа нема да биде чекорење по едноставен пат, тој пат ќе се соочиме со многу предизвици, искушенија и создадени дилеми, но јас сум сигурен дека тој пат ќе го завршиме со победа и успех опстојувајќи на нашите вредности и идентитетски карактеристики кои нас не дефинираат, и на нашата почит кон граѓаните кои ни ја даваат поддршката во изминатите 10 години. Во таа модерна битка ВМРО-ДПМНЕ ќе биде секогаш на страната на народот, со новата сила и нова енергија, со прецизна стратегија и со силен мотив да се реализираат заложбите на Илинден за слободна, самостојна и силна Република Македонија.

Нека е честит и вековит Илинден!

Нека е Вечно делото на двата Илиндена 1903 и 1944 година!

Нека е вечна славата на борците за слободна и независна државност!

Нека е вечна нашата татковина Македонија!