МКФ објави конкурс за ангажирање лица за организација на ЕП за кошаркарки до 16 години

Македонската кошаркарска федерација (МКФ) од 17 до 26 август 2017 година ќе биде организатор на Европско првенство за кошаркарки до 16 години Дивизија Б во Скопје.

На првенството, покрај кадетската репрезентација на Македонија ќе настапат уште 21 репрезентација. Натпреварите ќе бидат одиграни во салите на спортските центри „Борис Трајковски“ и „Јане Сандански“.

МКФ објави конкурс за ангажирање на лица кои ќе бидат дел од локалниот организациски комитет (ЛОК) и кои ќе придонесат за успешна организација на уште еден континентален собир во Скопје.

Во конкурсот на МКФ наведени и позициите односно за кои се бараат лицата за ангажирање како и начинот на аплицирање.

Ќе биде избран 21 водич за гостинските репрезентации. Пријавените треба да бидат на возраст од 18 до 25 години и со задолжително добро познавање на англискиот јазик. Кандидатите кои ќе влезат во потесен круг ќе бидат контактирани најдоцна до 5. август, 2017 година. Ангажманите на избраните апликанти почнуваат на 15. август и траат непрекинато до крајот на првенството односно 26. август 2017 година.

Заинтересираните можат да се пријават со испраќање на „CV“ со фотографија на jane.petkovski@basketball.org.mk, со назнака „За конкурс за ЕП во Скопје“.