ВМРО-ДПМНЕ: Српскиот дипломат ниту побарал ниту добил дозвола за влез во Собранието

ВМРО-ДПМНЕ смета дека чекорите кои ги презема Република Србија со повлекувањето на персоналот амбасадата, како и изјавите на српските политичари не кореспондираат со изјавите на македонските претставници, и тоа, според партијата, укажува дека постојат детали со кои јавноста не е запознаена.

– ВМРО-ДПМНЕ се надева дека македонската и српската влада ќе ги расчистат сите детали во врска со ова и ќе ја информираат јавноста. Расчистувањето на оваа афера, покрај утврдувањето одговорност на чија и да е страна треба да води и кон нормализација на односите меѓу двете држави, се вели во соопштението од ВМРО-ДПМНЕ.

Во врска со вчерашната информација дека на 27 април некоја македонска институција му дала согласност на српскиот дипломатски претставник да влезе во Парламентот на Република Македонија за време на инцидентот, ВМРО-ДПМНЕ тврди дека ниту една институција не добила такво барање, ниту издала одобрение.

– ВМРО-ДПМНЕ имајќи предвид дека сега е во опозиција, во текот на денешниот ден во рамките на своите можности вршеше проверки и утврди дека ниту МНР, ниту владата, ниту парламентот, ниту МВР или Агенцијата за разузнавање не добиле такво барање, ниту издале таква согласност и одобрение, се вели во соопштението.

Од партијата ја повикуваат новата влада која, како што велат, сега има контрола на сите институции, да провери дали такво нешто имало, и доколку имало да го објави документот со кој некоја институција издала такво одобрение.

– Доколку не се прикаже таков документ во наредните ден два, ќе констатираме дека дефинитивно такво нешто не е издадено, се посочува во соопштението од ВМРО-ДПМНЕ.