ВМРО-ДПМНЕ: Напади со оружје е животот што го вети СДС

Напад со нож, запален автомобил, пукање со огнено оружје се случија за само 24 часа по завршување на изборниот ден. Ова е животот кој го ветуваше СДС. Хаосот и незаконието продолжуваат и по изборите. Нападот со нож врз претседателот на ГРОМ, Стевчо Јакимовски од страна на лица блиски до СДС е обид за политичко замолчување, кое не смее да остане неказнето. Надлежните институции треба веднаш да реагираат и да го расветлат целиот случај во најбрз можен рок, се наведува во соопштението на ВМРО-ДПМНЕ.

-Физички напад врз политички опонент е напад врз демократијата, слободната мисла и правната држава и како таков мора да биде санкциониран. Запален автомобил на симпатизер на ВМРО-ДПМНЕ во Лисиче само неколку часа по завршувањето на изборите. Аздисаноста на криминалните структури блиски до СДС по изборите не запира, од медиумите видовме фотографии како двајца активисти на партијата се сликале со пиштоли пред штабот на партијата во Бутел. Според информациите објавени во медиумите активистите на СДС во Бутел во неделата вечер пукале со пиштоли и создавале хаос низ Бутел, велат од партијата.

Од ВМРО-ДПМНЕ додаваат дека ова се само неколку примери кои се видео и аудио документирани.

-Граѓаните имаат шанса да го казнат СДС и да ја ослободат државата од криминално-бандитските структури, нагласуваат од ВМРО-ДПМНЕ.