Димовски: Ставот за поддршка на планот „3-6-9“ е променет поради политичкиот реваншизам

Пратеникот на ВМРО-ДПМНЕ, Илија Димовски, рече дека ставот на партијата за поддршка на владините реформи од планот „3-6-9“ е променет, јавува телевизија „Алсат-М“.

Димовски додаде дека на оваа промена влијаеле последните случувања, односно одземањето на имунитетот на шесте пратеници на ВМРО-ДПМНЕ.

„СДСМ покажа дека нема потреба од опозиција во Собранието. Отсега понатаму сè е можно. Нашиот став е променет многу поради политичкиот реваншизам“, вели Димовски.

Собранието на 1 декември, на пленарна седница го одобри барањето на Основниот суд Скопје за одземање на имунитетот и за притворање на пратениците Крсто Муковски, Љубен Арнаудов, Јохан Тарчуловски, Сашо Василевски, Љупчо Димовски и Жаклина Пешевска, поради нивното учество во насилствата што се случија на 27 април годинава во Собранието.

Претходно, ставот на опозицијата беше дека ќе ги поддржи реформите на Владата што ќе го забрзат процесот за интеграција на државата во НАТО и во Европската Унија.