Турски производители на украсно цвеќе бараат партнери во Македонија

Идната недела во работна посета на Македонија ќе дојдат турски компании кои што произведуваат орнаментално, украсно цвеќе. Тие бараат партнери за заедничко производство и настап на трети пазари.

Од Македонско-турската стопанска комора (МАТТО) информираат дека станува збор за членови на Асоцијацијата на производители и извозници на цвеќе за просторно уредување кои ќе имаат Б2Б средби со македонски фирми.

Асоцијацијата е основана 1999 година за да го претставува и поддржува секторот за производство и трговија со орнаментални растенија и да го развива извозот. Во 2016 година Турција има извезено преку 100 милиони долари од овие производи, а планот е до 2023 извозот да надмине 500 милиони. Се извзува во 65 земји од кои најголеми купувачи се Туркменистан, Холандија, Англија, Германија и Ирак.

Според некои проценки во Турција по глава на жител се трошат по пет евра годишно за кушување на украсно цвење, а извозната индустрија вработува 25 илјади луѓе, додека домашната над 300 илјади.

Производството на цвеќе во Македонија е доста раширено, особено во југоисточниот дел, струмичкиот и гевгелискиот регион како и во Скопје.

– Но, во Македонија денес производството на цвеќе е семеен бизнис кој се развива на мали парцели, по пластеници, а продажбата е главно по пазарите. Производството во стакленици е многу скапо бидејќи бара затоплување во текот на зимата. Поевтино е да се увезе од држави во кои цвеќарството е традиција, отколку да се произведува дома, велат од Комората и додаваат дека речиси 80 отсто од цвеќето кое се продава на домашниот пазар е од увоз, сметаат од МАТТО.

Од МАТТО порачуваат дека време е во Македонија да се развие стратегиски пристап кон овој тип индустрија и да се размисли за обезбедување поддршка преку субвенции и поттикнување на домашни и странски инвестиции.

– Осумдесетите години произведувавме и го извезувавме цвеќето со поддршка на холандски партнери, истакнуваат од Македонско-труската стопанска комора.