Мицкоски оствари средба со Горазд Бартол, шеф на канцеларијата за врски на НАТО во Македонија

Претседателот на ВМРО-ДПМНЕ Христијан Мицкоски оствари средба со Горазд Бартол, шеф на канцеларијата за врски на НАТО во Македонија.

Претседателот на ВМРО-ДПМНЕ Христијан Мицкоски, денес (09.01.2018 година) придружуван од Владимир Ѓорчев и Александар Николоски оствари средба со делегација на НАТО, предводена од Горазд Бартол, шеф на канцеларијата за врски на НАТО во Македонија.

На средбата се разговараше за приоритетите на Република Македонија за нејзино членство во НАТО, актуелните политички случувања во земјата, како и за реформските процеси.

На средбата, претседателот на ВМРО-ДПМНЕ, Мицкоски, истакна дека стратешка определба на Македонија е полноправно членство во НАТО. Мицкоски посочи дека членството на Македонија во НАТО останува интерес и цврста определба на ВМРО-ДПМНЕ.

Исто така на средбата Мицкоски го информираше Бартол за политичкиот прогон на пратениците на ВМРО-ДПМНЕ и Коалицијата за Подобра Македонија од страна на власта, како и за одлуката за неучество во работата во Собранието на пратеничката група предводена од ВМРО-ДПМНЕ, се додека не се создадат услови за нормално демократско функционирање на Собранието.

Претседателот на ВМРО-ДПМНЕ, истакна дека ВМРО-ДПМНЕ е подготвена да ги поддржи реформските процеси за кои ќе оцени дека е во интерес на државата, но исто така е потребна активност и добра волја од страна на власта преку конкретни чекори со кои ќе ја потврди сериозноста во пристапот за реформските процеси кои треба да се спроведат.

На средбата стана збор и за престојната посета на Македонија на Генералниот секретар на НАТО, Јенс Столтенберг и за билетералната средба помеѓу претседателот на ВМРО-ДПМНЕ Мицкоски и Генералниот секретар на НАТО, Столтенберг.