Надал се предаде, олеснет патот на Федерер за нова грен-слем титула

Хрватскиот тенисер Марин Чилиќ обезбеди полуфиналето на Австралија опен, откако најдобар играч на светот, Рафаел Надал, го предаде натпреварот во вториот гем од петтиот сет поради повреда.

Резултатот во тој момент беше 2-2 во сетови и 2:0 во гемови во решавачкиот сет.

Надал, во средината на четвртиот сет побара медицински тајм-аут поради болка во бутниот мускул. Тој успеа да издржи до крајот на четвртиот сет и кога се чинеше дека е тешко да се движи, тој влезе во последниот сет.

Сепак, откако го загуби својот сервис на почетокот на петтиот сет реши да му го предаде мечот на Хрватот.

Чилиќ во полуфиналето ќе игра против Британецот Кајл Едмунд кој во првото четвртфинале рано наутро го совлада Бугаринот Григор Димитров.