Министерство за финансии: Нема да има нови давачки поврзани со брзиот трансфер на парите

„Во насока на точно информирање на јавноста Министерството за финансии ги информира граѓаните дека нема промена во оданочувањето на дознаките“, информираа од Министерството за финансии.

„Ова значи дека и понатаму ќе се применува постоечкото законодавство, според кое приливите по основ на лични трансфери, помош и подароци не се оданочуваат, додека дел од останатите приливи и понатаму ќе бидат предмет на оданочување, како на пример приливи по основ на извршена услуга.

Со предложените измени на Законот за вршење на услуги брз трансфер на пари, се прави понатамошно усогласување со европското законодавство во делот на даночната евиденција.

Поточно, со овие измени се овозможува УЈП да има покомплетна евиденција на сите приливи, независно од нивното потекло, како и зајакнување на борбата против даночното затајување. Притоа, предложените измени не претставуваат никаква промена на даночната политика, односно не претставуваат оданочување на дознаките“, стои во соопштението од Министерството за финансии.