Акциите на „Русал“ ќе исчезнат од берзата

Акциите на компанијата Русал на рускиот бизнисмен Олег Дерипаска ќе исчезнат од берзата, пренесуваат светските медиуми.

Американското Министерство за финансии најави санкции против седум руски олигарси и 12 компании во нивна сопственост, односно под нивна контрола, со образложение дека профитираат од „малигни активности“ на руската држава во целиот свет.

Групата руски бизнисмени, меѓу другите, ги вклучува Олег Дерипаска и неговата Русал, чии акции котираат на берзата во Хонг Конг и неговата холдинг група Ен груп.

Акциите на Русал, кој спаѓа меѓу најголемите производители на алуминиум, ќе бидат избришани од светските индекси, а најавена е и забрана за тргување на неговиот метал на Лондонската берза на метали (ЛМЕ) и групата ЦМЕ.

ФТСЕ најави отстранување на Русал и Ен груп од своите индекси на отворањето на берзите, почнувајќи од денеска.

Медиумите утрово објавија дека цената на Русал, Ен Груп и швајцарската компанија „Сулзер“ веќе не се појавуваат. Олег Дерипаска е еден од најбогатите Руси, близок пријател на рускиот претседател Владимир Путин.