Назначен нов директор на прилепски „Еурокомпозит“
Дипломираниот машински инженер од Прилеп Златко Граороски е нов директор на прилепската наменска фабрика „Еурокомпозит“. Граороски, кој доаѓа од приватна фирма, вели дека денеска официјално е назначен од претставникот на државниот капитал на компанијата.
- Се уште ништо не може да се рече. Треба да се скенира ситуацијата во фирмата, рече кратко Граороски.
Според синдикатот на компанијата, добро е што конечно се реши прашањето за назначување директор на „Еурокомпозит“ и се очекува наредните три месеци да се реши и прашањето за судбината на вработените и на компанијата.
- Нам како на вработени и на синдикат ни е битно што е избран прв човек на компанијата, да земаме редовно плата и наредните три месеци да се реши судбината на компанијата, но и да се конкретизира пакетот за технолошки вишок како што последно е договорено со премиерот Заев, ни изјави Роберт Богданоски, претседател на синдикатот на „Еурокомпозит“.
Во наменската фанрика „Еурокомпозит“ се околу 260 вработени и според договорот се очекува да се реши судбината на компанијата со стратегиски инвеститор со што ќе се исплатат заостанатите плати и придонеси за вработените како и оформување пакет за технолошки вишок за 100 вработени.
