Трамп го откажа самитот со Ким Џонг- ун

Трамп го откажа самитот со Ким Џонг- ун Вашингтон - Претседателот на САД Доналд Трамп го откажа долго планираниот и очекуван самит со севернокорејскиот лидер Ким Џонг- ун, кој требаше да се одржи на 12 јуни во Сингапур.

Во соопштението од Белата куќа се вели дека Трамп го откажал самитот поради „огромниот гнев и отвореното непријателство на Ким во неговото неодамнешно соопштение“.

- Се радував однапред дека ќе бидам таму со вас. За жал, поради огромниот гнев и отвореното непријателство прикажано во последната изјава, сметам дека е непримерно, во овој момент, да се одржи овој долго планиран состанок, му напиша Трамп на севернокорејскиот лидер.

Вие, наведува американскиот претседател, зборувате за вашата нуклеарна способност, но, нашата е толку масивна и моќна што јас го молам Господ никогаш да не биде употребена.

Американскиот претседател му се заблагодари на Ким за ослободување на заложниците, кои се сега дома со своите семејства.

-Тоа беше убав гест, кој многу го ценам. Светот, особено Северна Кореја, загуби голема шанса за траен мир и голем напредок и богатство, оцени Трамп, додавајќи дека е пропуштена можноста и дека е „тажен момент во историјата".

Претходно денеска, Северна Кореја повторно се закани дека ќе го откаже самитот, додавајќи дека е подготвена за средба за нуклеарна пресметка, колку и за состанок на преговарачка маса.

Заменик-министерката за надворешни работи на Северна Кореја Чо Сон Хуи изјави дека иднината на самитот Пјонгјанг- Вашингтон е „целосно" на САД и ги осуди коментарите на американскиот потпретседател Мајк Пенс, во кои ја спореди Северна Кореја со Либија.