Анѓушев: Економските политики даваат резултати

Заменик претседателот на Владата за економски прашања Кочо Анѓушев, во емисијата Топ тема ги објасни со бројки и аргументи владините мерки за економски раст. Тој ги изнесе аргументите за економскиот раст кои зборуваат за 0,1 отсто раст на БДП. Земјоделството порасна за 6,5%, индустријата 5,5%, трговијата на големо 10% и многу други гранки се пораснати, освен градежништвото, и тоа високоградбата е порасната за 2%, а нискоградбата е падната за 38%.

Вицепремиерот ги изнесе и разликите во економските политики и односот кон економијата на сегашната и претходната влада.

- Ако зборуваме за раст во парични средства, Македонија во првиот квартал има раст од 4,8% во 2018 наспроти првиот квартал од 2017 година. Бројките кажуваат дека знаеме што правиме, со каков ризик влеговме за да ја санираме ситуацијата и знаеме како бројките да ги направиме подобри, но на една домаќинска основа. Сигурно нема да изградиме нови фасади и споменици за да ги подобриме бројките. Ние правиме економски оправдани проекти. Ако прашањето е дали ќе трчаме по реализација по секоја цена или по домаќинско работење. Оваа влада, заедно со премиерот и економскиот тим го одбра и ќе оди по вториот пат, којшто е потежок но ќе даде подобри резултати на долг рок“, истакна Анѓушев.

Анѓушев ги изнесе, каком што наведе, несоодветните политики на претходната влада и негативните ефекти што ги имаа врз економијата.

- Ако како политика се креираат вештачки фирми кои се политички поддржани, како што беше практика на претходната влада, се прават две штети, едната е создавање нелојална конкуренција за реалните фирми, а другата е откако ќе заврши политичкиот чадор, тие фирми што се политички поддржани и ќе пропаднат, појасни вицепремиерот за различниот пристап во економските политики на оваа и претходната влада.

За мерките за економски раст појасни дека сега имаме закон и методологија за поттикнување на инвестициите, односно кој инвестирал тој ќе биде помогнат, кој вработил луѓе и дал плата повеќе, тој ќе биде помогнат. Но, тоа се прави по јасни критериуми.

- Останатите бројки кажуваат многу позитивни индикатори, паричните текови се зголемени за 4,8%, во првиот квартал од 2018 наспроти истиот период 2017 година. Даноците се зголемени во своето собирање, а за невработеноста сега на крајот од овој квартал е на најниско ниво од 21,6% а претходниот квартал бил 21,9%. Бројот на невработени бил 213 000, а сега има 206 000. Притоа никој се уште не добил соодветна помош, значи законот за финансиска помош допрва треба да ги даде своите резултати. Првиот квартал по основ на странски инвестиции е 235 милиони евра, наспроти мината година кога бил помалку, или тој поедноставно тоа е најголем износ од кој било квартал од 2007 година па досега, истакна Анѓушев.

Тоа, според него, се аргументи и бројки кои кажуваат каде е насочена оваа политика и кон каде ќе се движи владата.

- Мора да престанеме да бидеме дестинација каде вработените ќе работат за 9000 денари, наша цел е и за тоа имаме дизајнирано мерки, Македонија да ја претставиме како земја каде што работат млади и паметни луѓе и за тоа ќе земаат адекватни плати, заклучи Анѓушев.