Во Охрид субвенции на уплатена такса за привремен престој на домашни и странски туристи
Охридските приватни станоиздавачи ќе можат дел од средствата уплатени на име такса за давање услуги да ги искористат за реконструкција на ентериерот на своите капацитети.
Согласно одлуката на Секторот за туризам и локален економски развој, приватните станоиздаватели и физички лица вршители на угостителска дејност во општина Охрид треба да достават барање за субвенционирање на уплатената такса за привремен престој на домашни и странски туристи и на тој начин да добијат поврат до 80 проценти од вкупниот износ.
Станува збор за таксата уплатена по основ на вкупниот број на остварени ноќевања за периодот од јануари заклучно со јуни оваа година, со забелешка дека станоиздавачот е обврзан за предвидените средства да набави опрема, мебел и други производи за опремување на неговиот сместувачки капацитет. Субвенциите не предвидуваат извршување градежни зафати на сместувачките објекти. Исплатата ќе се врши по приемот на доставените барања, потврдени со соодветни фискални сметки, фактури или други финансиски документи како доказ за извршената набавка.
Целта на активноста е поттикнување на физичките лица - вршители на угостителска дејност во oпштина Охрид уредно да ја водат евиденцијата за престојот на гостите во својот сместувачки објект, со што ќе се стимулира редовната наплата на ТПП и ќе се избегне нејзиното прикривање.
