Албанското тло и натаму се тресе

Од 4 јули кога беше регистриран првиот потрес во близина на Драч, албанското тло постојано се тресе.

Последните три земјотреси се регистрирани утрово во интервал од 01:09 до 04:51 часот со епицентри во градовите Пеќин, Ѓирокастро и Вора кај Тирана. Земјотресите биле со интензитет до 2,2 степени според Рихтеровата скала.

- Од првиот земјотрес кој беше со интензитет од 5,2 степени според Рихтер, со епицентар кај Драч, до денеска, се регистрирани 830 потреси со различен интензитет. Сите се со послаб интензитет од првиот, и се од 2,2 до 4,7 степени. Тлото пополека се смирува и сметам дека нема место за паника, изјави сеизмологот Едмонд Души.

Сепак, според него, земјотресите се непредвидливи и не може со сигурност да се каже дали ќе има уште змјотресе или или не, особено ако се знае дека Албанија е во тектонски активно подрачје.

Земјотресите предизвикаа само помала материјална штета и вознемиреност кај граѓаните.

Дел од потресите кои беа со појак интензитет беа почувствувани и во западниот дел на Македонија, посебно во подрачјето на Дебар.