Помпео: САД нема да молчат за авторитарноста на иранскиот режим

Државниот секретар на САД, Мајк Помпео ги нарече верските лидери на Иран „лицемерни светци“ кои натрупале големо богатство додека нивниот народ страда.

- Понекогаш ми се чини дека светот стана нечувствителен на авторитарноста на иранскиот режим во земјата и нивните кампањи на насилство во светот, но гордиот ирански народ не молчи за бројните владини репресии, посочи Помпео.

Тој додаде дека ниту САД и претседателот Доналд Трамп нема да молчат и „по повод 40 години од режимот на тиранија“ упати порака до народот на Иран дека САД „ги слушаат, поддржуваат и дека се со нив“.

Помпео ги критикуваше и политичките и воените лидери на Иран, обвинувајќи ги за учество во сеопшта корупција, додавајќи оти иранската Влада „бездушно ги крши човековите права, достоинството и основните слободи на својот народ“.

Американскиот државен секретар потенцира и дека САД преземаат кампања на дипломатски и финансиски притисок за стопирање на финансирањето, како и повторно воведување на санкции за банкарскиот и енергетскиот сектор во Иран.

Трамп во мај ги повлече САД од мултилатералниот Договор за иранската нуклеарна програма, а се очекува првите санкции да бидат воведени на 4 август.