Властите на ОАЕ негираат дека бил нападнат аеродромот во Абу Даби

Обединетите Арапски Емирати го негираа тврдењето на јеменските шиитски бунтовници Хути дека извршиле напад со дрон врз аеродромот во Абу Даби.

Владин претставник информираше дека аеродромот функционира нормално.

Аеродромската управа претходно информираше за инцидент со логистичко возило, но не прецизираше дали се работело за напад од надвор.

Обединетите Арапски Емирати се дел од сунитската коалиција предводена од Саудиска Арабија, која војува против шиитските Хути во Јемен.

Хутите досега извршија повеќе напади врз Саудиска Арабија, при што се обидуваа да го погодат аеродромот во Ријад со крстосувачки проектили, за кои Саудиска Арабија тврди дека им биле доставени од Иран.