Австралиец со албанско потекло осуден за подготовка на терористички напад

Австралиец со албанско потекло од австралиската сојузна држава Квинсленд, е осуден на 17 години затвор порадо планирање самоубиствен напад на територијата на Австралија.

Осудениот 25-годишен Агим Крузеи беше уапсен во антитерористичка акција во местото Логан во април 2016 година, по што се изјасни за виновен по обвинението за подготовка на терористички напад и подготовка на упад во странска држава.

Обвинителот Линколн Кроули пред Судот изјави дека Круези планирал „да убие невини луѓе на јавен простор и на крајот да умре како маченик во тој напад“.

- Круези покажа поддршка за мачеништвото, бидејќи верува дека мачениците автоматски одат во рајот и дека и тој таму ќе одел набрзо, изјави Кроули.

При апсењето на Круези, во неговиот дом беа пронајдени полуавтоматско оружје, муниција, примерок од книгата "Џихад" и знамето на групата Исламска држава..

Неколку дена пред неговото апсење, Круези набавил 10-литарска метална канта и стаклени шишиња со цел да изработи молотови коктели. Во неговиот компјутер биле пронајдени и видеа на кои се гледа како пука во макета од стиропор, како и упатства како се сечат глави.

Кога сакал да замине да војува за Сирија австралиските власти му го одзеле пасошот.

Судијката Рослин Аткинсон изјави дека не е убедена оти Круези немал екстремни ставови. - Нема докази дека сте ги смениле ставовите. Не гледам никакви докази дека се каете, нагласи судијката.

Во моментот кога се оддалечувал од судската сала со лисици на рацете неговите роднини,ивзикувале: „Многу набрзо ќе се видиме. Те сакаме“.

Круези може да биде условно ослободен по издржување на 13 години од затворската казна.