ОН бара од Белгија да не затвора деца бегалци

УНХЦР, телото на Обединетите Нации задолжено за белгалци, реагираше на реактивирањето на стар закон во Белгија, со кој повторно ќе биде дозволено деца бегалци и мигранти да бидат задржани во затворени центри, пред да бидат протерани, јави дописничката на МИА во Брисел.

-Децата, посебно оние кои доаѓаат од друга земја во потреага по меѓународна заштита, се екстремно кревки и имаат специфични потреби. Треба да ги третираме пред сѐ како деца, а не како странци во нередовна ситуацијата, изјави Вероник Робер задолжена за Западна Европа во УНХЦР.

УНХЦР потсетува да затворските услови се многу трауматични за децата, дури и кога престојот е кус или се со своето семејство.

-Затворањето едноставно никогаш не е во интерес на детето. Оваа лоша пракса ја нарушува Конвенцијата за правата на детето од многу погледи и треба да и се стави крај, додаде Робер.

Белгија во саботата повторно активираше закон со кој се дозволува децата да бидат затворени во центри, а “семејни единици“ веќе се отворени во главниот центар наречен “Стенокерзел“. Белгија во 2009 мораше да и стави крај на оваа пракса откако беше осудена од страна на Судот за човекови права.