Рохани: Кашоги е убиен со поддршка од САД

Претседателот на Иран, Хасан Рохани денеска изјави дека Саудиска Арабија не би се осудила да го убие Џамал Кашоги во Конзулатот во Истанбул без да има поддршка од САД.

– Мислам дека без американска поддршка таа земја (Саудиска Арабија) не би се осудила да стори такво злосторство, посочи Рохани .

Но, тој не понуди никакви докази за таквото тврдење.

Рохани саудискиот систем го нарече „племенско владеење“ , каде поединци имаат заштита и поддршка од луѓето на власт, така што ниту еден суд нема да преземе мерки против нив.

Саудискиот новинар и дописник на „Вашингтон пост“ 59-годишниот Кашоги исчезна на 2 октомври, а последен пат е виден како влегува во Генералниот конзулат на Саудиска Арабија во Истанбул. По повеќедневно демантирање, официјален Ријад во петокот призна дека Кашоги е убиен во Конзулатот во непланирана „караница и тепачка“.