Запленети 68 мрежи во акција против рибокрадци на Охридското езеро

Државниот инспекторат за земјоделство вчера организираше акција за спречување на рибокрадци на Охридското езеро. Акцијата се одвиваше со поддршка на припадниците на езерската полиција од СВР Охрид, а беше иницирана од сознанијата дека се врши масовно рибокрадење, особено во регионот на селата Калишта, Радожда, Пештани.

Запленети се вкупно 346 парчиња охридска белвица со вкупна тежина од 36.5 кг. Одземени се 68 рибарски мрежи со димензии на окца од 26×26 мм со вкупна должина од 3400 м и 6 мрежи за лов на јагула со димензии на окца 32×32 или вкупно 300 м, соопшти Државниот инспекторат за земјоделство.

Запленети се и 20 мрежи за лов на белвица со димензии 28X28 мм со вкупна должина од 1000м. Овие мрежи се во сопственост од познат сторител.

При чистење на белвичарските мрежи беа извадени 20 парчиња подмладок од охридска пастрмка, со тежина од 150 до 200 грама кои беа внимателно извадени и вратени во Охридското езеро.