Хотелот „Вила Зора" во Велес ќе стане пензионерски дом

Општина Велес планира, некогашниот пензионерски дом, што беше пренаменет во хотелот „Вила Зора", во партнерство со странски инвеститори повторно да го уреди во пензионерски дом за сместување и згрижување на стари лица.

Поранешниот хотел „Вила Зора" веќе девет години е запуштен, риуниран и нефункционален. Имено, половина од хотелот е во сопственост на Општина Велес.

Градоначалникот на Велес, Аце Коцевски за МИА наведе дека уредувањето не можат да го направат сами како Општина, поради тоа, согласно со Законот за концесии и јавно приватно партнерство, планираат да го дадат на странски инвеститор, со цел објектот да биде реновиран и преуреден во Пензионерски дом.

Тој посочи дека во текот на минатата недела заинтересиран странски инвеститор бил на разговори во Општината, како и во посета на местото.

– Општината се надева дека во скоро време некој заинтересиран странски инвеститор ќе вложи средства.Ваков објект за сместување и згрижување на стари лица во Велес и регионот е повеќе од неопходен затоа што младите се' повеќе заминуваат во странство и нема кој да се грижи за нивните постари родители,потенцира Коцевски.

Имено, поранешниот Пензионерски дом во Велес беше изграден во 1985 година.